16 XYOO LUB XOV TOOJ CUA " ZOO TSWV ZOV YAJ "

   Hnub tim 1 lub 12 hlis xyoo 1994, pib qhib lub xov tooj cua ZOO TSWV ZOV YAJ hais lus Hmoob. Tsoom Hmoob feem coob yog nyob hauv xeev ntuj As Xias, xws li Los Tsuas teb, Cob Tsib teb, Thaib teb, thiab Suav teb. Cov Hmoob nyob Suav teb muaj li ntawm 7 plhom tawm leej. Nyob Thaib teb muaj li ntawm 130,000 leej. Peb tsoom Hmoob feem coob yog coj kev cai dab qhuas.

   Hmoob yog ib haiv neeg nyiam ua lub neej nyob pem toj siab, nyiam nyob ywj siab ywj ntsws tsis zwm rau leej twg. Tab sis cov Hmoob uas lawv nyob hauv cov teb chaws Koom Tshaj, mas tseem hwv txwv lawv nruj kawg txog txoj kev ntseeg Ntuj. Ces cov Hmoob tus puav rov qab teev dab qhuas.Tab sis, peb cov kwv tij Hmoob coob uas tau ntseeg Ntuj los tau 3 los 4 tiam neeg, lawv lub siab npuab kev ntseeg Ntuj ruaj nreb xws li ncej zeb, ruaj nrees li ncej tsuas, dej tshoob tsis qaij, cua tshuab tsis qaug.

   Cov kwv tij Hmoob uas lawv niaj hnub mloog peb lub tshaj xo ZOO TSWV ZOV YAJ, mas muaj coob leej sau ntawv tuaj thov kom peb siv lub sij hawm tshaj xo ntev dua qub thiab lig dua puas tau. Vim lawv yog ib co neeg ua liaj ua teb, ces lawv los txog tsev lig. Li ntawd lub 1 hlis xyoo 2008, peb thiaj tau pauv sij hawm tshaj xov thaum 5:00p.m. nyob rau Thaib teb, Los Tsuas teb, thiab Cob Tsib teb los tshaj xov thaum 7:00p.m. hos nyob rau Suav teb pauv sij hawm tshaj xov thaum 6:00p.m. los tshaj xov thaum 8:00p.m. Lawv kuj nyiam thiab txaus siab rau txhua zaj uas lub xov tooj cua ZOO TSWV ZOV YAJ tshaj tawm. Niaj hnub peb tshaj xov xwm yog 6 feeb, hos hnub Wednesday peb siv 25 feeb los tshaj tej zaj xov xwm ntev hais txog ntiaj teb cov teeb meem loj.  

   Xyoo 2007 peb pib tshaj tej zaj lus kom haum cov Hmoob lub neej, xws li txhib kom cia cov tub ntxhais mus kawm txuj. Peb kuj tshaj tej zaj pab ntxiv tswv yim rau peb cov kwv tij Hmoob, hais txog kev sib zam txhaum, kev fim luag tej, kev noj huv, haus huv, hnav huv, tsis txhob haus tshuaj quav tshuaj qaug, tsis txhob ua cov lag luam txhaum kev cai. Thiab peb kuj qhia ntawv Hmoob.  

   Hmoob ib txwm coj kev cai dab qhuas, ces lawv lub siab npuab lawv tej kev cai dab qhuas. Peb tsis thuam Hmoob kev cai, thiab tsis saib Hmoob tej kev cai dab qhuas qis qis, vim Hmoob cov kev cai dab qhuas yog ib yam muaj nqis rau Hmoob. Peb vam tias cov zaj lus uas peb tau tshaj tawm yuav ntxim tsoom Hmoob lub siab.

   Cov neeg uas npaj tej zaj tshaj xo yog 4 tug Hmoob uas lawv khwv ua hauj lwm npaj cov zaj tshaj xo nyob tim Lomsak, hauv Thaib teb thiab Txiv Plig Txhiaj Foom nyob rau Fis Lis Pees teb.
Los txog tav no, mas peb tsuas siv xeem lus Hmoob Dawb los hais lus nyob hauv lub tshuab tshaj xo ZOO TSWV ZOV YAJ xwb. Tab sis cov Hmoob uas nyob Suav teb thiab Cob Tsib teb feem coob lawv hais xeem lus Hmoob Ntsuab, ces cia saib yav tom ntej peb puas yuav tshaj xo ua lus Hmoob Ntsuab.