Haiv neeg Hmoob yog ib haiv neeg nyiam ua lub neej nyob pem toj siab, nyiam nyob ywj siab ywj ntsws, tsis zwm rau leej twg. Tsoom Hmoob feem coob nyob hauv xeev ntuj As Xias, xws li Suav teb, Cob Tsib teb, Los Tsuas teb thiab Thaib teb. Cov Hmoob nyob Suav teb muaj 7 plhom tawm leej tej, nyob Cob Tsib teb muaj 790,000 leej, nyob Los Tsuas teb muaj 450,000 leej, nyob Thaib teb muaj 150,000 leej tej. Peb tsoom Hmoob feem coob yog coj kev cai dab qhuas hos cov coj kev cai ntseeg Ntuj tseem muaj tsawg. Hos peb niaj hnub nco tias cov Hmoob uas lawv nyob hauv cov teb chaws Koom Tshaj, mas tseem hwv txwv lawv nruj kawg txog txoj kev ntseeg Ntuj. Ces cov Hmoob ntseeg Ntuj tus puav rov qab mus teev dab qhuas. Tab sis, peb cov kwv tij Hmoob coob uas tau ntseeg Ntuj los tau 3 los 4 tiam neeg, lawv lub siab npuab kev ntseeg Ntuj ruaj nreb xws li ncej zeb, ruaj nrees xws li ncej tsuas, dej tshoob tsis qaij, cua tshuab tsis qaug mas lawv kuj tsis kam tso tseg txoj kev ntseeg Ntuj.
Hnub tim 1 lub 12 hlis xyoo 1994, pib qhib lub xov tooj cua ZOO TSWV ZOV YAJ hais lus Hmoob. Tus xub pib txoj hauj lwm no yog Txiv Plig Nyiaj Pov. Thaum ntawd Txiv Plig Nyiaj Pov thiab Yaj Chiv ( Txiv Plig Cwj Vuam Chiv Yaj ) npaj cov zaj thiab zom lus tso rau hauv roj hmab nyob rau Nkws Yas teb thiab xa cov roj hmab tuaj tshaj tawm rau hauv Radio Veritas Asia nyob Fis Lis Pees teb. Lub tshaj xov xa Yes Xus lub Moo Zoo mus rau cov Hmoob nyob Suav teb, Cob Tsib teb, Los Tsuas teb thiab Thaib teb. Txiv Plig thiab Yaj Chiv nkawd kaw roj hmab tshaj Ntuj lus tau 3 xyoos, ces nkawd muab tshais chaw tuaj nyob kiag rau Fis Lis Pees teb, kom tau kev ua hauj lwm yooj yim. Xyoo 1999, Txiv Plig Nyiaj Pov qhib lub tsev hauv paus xov tooj cua nyob Lomsak, Thaib teb. Lub tsev hauv paus xov tooj cua txoj hauj lwm yog npaj cov zaj kom txaus tshaj xov 7 hnub.
Xyoo 2007 peb pib tshaj tej zaj kom haum cov Hmoob lub neej, xws li txhib kom cov niam cov txiv cia cov tub ntxhais mus kawm txuj. Peb kuj tshaj tej zaj pab ntxiv tswv yim rau cov kwv tij Hmoob, hais txog kev sib zam txhaum, kev fim luag tej, kev noj huv, haus huv, hnav huv, tsis txhob haus tshuaj quav tshuaj qaug, tsis txhob ua cov lag luam txhaum kev cai thiab peb kuj qhia ntawv Hmoob nyob rau hauv xov tooj cua.
Lub 1 hlis xyoo 2008, peb tau hloov lub sij hawm tshaj xo thaum 5:00p.m. nyob rau Thaib teb, Los Tsuas teb, thiab Cob Tsib teb, los tshaj rau thaum 7:00p.m. Hos nyob rau Suav teb pauv lub sij hawm tshaj xov thaum 6:00p.m. los ua 8:00p.m. Vim cov kwv tij Hmoob uas lawv niaj hnub mloog peb lub tshaj xo ZOO TSWV ZOV YAJ, mas muaj coob leej sau ntawv tuaj thov kom peb siv lub sij hawm tshaj xo lig dua puas tau. Rau qhov lawv yog ib co neeg ua liaj ua teb, ces lawv los txog tsev lig. Niaj hnub peb tshaj xov xwm yog 6 feeb, hos hnub lis piam tim 4 ( Wednesday ) peb siv 25 feeb los tshaj tej zaj xov xwm ntev hais txog ntiaj teb cov teeb meem loj. Cov Hmoob kuj nyiam thiab txaus siab rau cov zaj uas lub xov tooj cua ZOO TSWV ZOV YAJ tshaj tawm.
Ib txwm yav tag los, mas peb tsuas siv xeem lus Hmoob Dawb los hais lus nyob hauv lub tshuab tshaj xo ZOO TSWV ZOV YAJ xwb. Tab sis cov Hmoob uas nyob Suav teb thiab Cob Tsib teb feem coob hais xeem lus Hmoob Ntsuab los yog lus Hmoob Leeg. Ces hnub tim 12 lub 2 hlis xyoo 2010, peb thiaj pib tshaj xo xeem lus Hmoob Leeg tawm. Nyob hauv ib lis piam ib hnub yog hnub lis piam tim 6 ( Friday ) peb nthuav piav Ntawv Moo Zoo Hnub Chiv ua xeem lus Hmoob Leeg.
Cov neeg uas npaj tej zaj tshaj xo nyob hauv xov tooj cua yog 4 tug Hmoob nyob hauv lub tsev hauv paus xov tooj cua Lomsak, Thaib teb thiab Txiv Plig Txhiaj Foom nyob rau Fis Lis Pees teb. 
Xov Tooj Cua Zoo Tswv Zov Yaj tshaj tawv txhua txhia hnub. Peb kab lus tshaj xo yog SW1 Ncua lus 11.935 MHz los sis 25.14 Mev. ( Time Block UTC 12.00 - 12.27 ) Nyob rau Cob Tsib Teb, Los Tsuas Teb thiab Thaib Teb mloog tau rau thaum sij hawm 7.00 - 7.30 pm. Nyob rau Suav Teb mloog tau rau thaum sij hawm 8.00 - 8.30 pm. Sij hawm raws nroog Pej Ceeb.